(This entry was originally published in English on Sep. 9, 2009)
ຕັ້ງແຕ່ໄດ້ເຮັດວຽກເພື່ອຊ່ວຍເຫຼືອວຽກງານດ້ານການສື່ສານ ແລະ ຂໍ້ມູນຂ່າວສານໃຫ້ແກ່ໂຄງການ ໄຟຟ້ານ້ຳເທີນ 2 (NT2) ຢູ່ລາວໃນຕົ້ນປີນີ້, ຂ້ອຍກໍ່ໄດ້ຟັງຫຼາຍຄົນເວົ້າວ່າ ໂຄງການນີ້ມີຄວາມໝາຍຫຼາຍກ່ວາໂຄງການພັດທະນາໄຟຟ້ານ້ຳຕົກ. ຖ້າຫາກໄດ້ອ່ານ ແລະ ສຶກສາຄົ້ນຄ້ວາ ກ່ຽວກັບການປະຕິຮູບໂຄງສ້າງຫຼາຍໆດ້ານ ທີ່ລັດທະບານລາວໄດ້ຈັດຕັ້ງປະຕິບັດ ເພື່ອດຳເນີນໂຄງການດັ່ງກ່າວ, ທ່ານຈະສາມາດເຂົ້າໃຈວ່າເປັນຫຍັງຄົນຈຳນວນຫຼາຍຈຶ່ງເວົ້າແນວນັ້ນ. ໃນມໍ່ໆມານີ້, ຂ້ອຍກໍ່ໄດ້ມີໂອກາດໄປສຳພາດກັບບາງວຽກງານ ທີ່ໄດ້ປະກອບສ່ວນອັນສຳຄັນໃຫ້ແກ່ໂຄງການນີ້ ແລະ ເປັນປະສົບການທີ່ຫຼາຍຄົນບໍ່ອາດຄາດຄິດມາກ່ອນ ແຕ່ມັນແມ່ນມີຄວາມໝາຍອັນສຳຄັນຕໍ່ໂຄງການ.
ໃນອາທິດທີ່ຜ່ານມານີ້, ຂ້ອຍໄດ້ລົງໄປໃນເຂດໂຄງການນ້ຳເທີນ 2 ໂດຍສະເພາະ ແມ່ນເຂດຍົມມະລາດ ແລະ ນາກາຍ ພ້ອມກັບເພື່ອນຮ່ວມງານຈຳນວນໜຶ່ງ ທີ່ມາຈາກ ວໍຊິງຕັນດີຊີ. ພາຍຫຼັງຢ້ຽມຢາມເຂດໂຄງການແລ້ວ, ພວກເຮົາໄດ້ເດີນທາງໄປບ້ານຈັດສັນໃໝ່ ເພື່ອໂອ້ລົມກັບປະຊາຊົນກ່ຽວກັບຊີວິດການເປັນຢູ່ປະຈຳວັນ. ພວກເຮົາໄດ້ໂອ້ລົມກັບປະຊາຊົນ ແລະ ໄດ້ສຶກສາເບິ່ງເຮືອນຊານ, ພ້ອມກັບ ຈັກສູບນ້ຳ, ໄຟຟ້າ, ສວນ ແລະ ຕອນດິນປູກຝັງທີ່ບໍ່ຫ່າງໄກຈາກບ້ານຫຼາຍປານໃດ.
- ໃນຂະນະທີ່ພວກເຮົາໄດ້ຍ່າງອ້ອມບ້ານທ່າລັງ ເຊິ່ງເປັນໜຶ່ງໃນຈຳນວນ 16 ບ້ານຈັດສັນໃໝ່, ພວກເຮັາກໍ່ແປກໃຈ ເມື່ອແນມເຫັນສິ່ງປະກອບທີ່ຜິດປົກກະຕິ ຢູ່ສວນຜັກ ຂອງເຮືອນຫຼັງໜຶ່ງ ເຊິ່ງເປັນທີ່ຈັບຕາຂອງພວກເຮົາ. ພວກເຮົາຍັບເຂົ້າໄປຢູ່ໃກ້ເທົ່າໃດ, ສຽງດັງອ້ອມຂ້າງພວກເຮົາກໍ່ຄ່ອຍໆ ງຽບສະງັດລົງ, ແລະ ສຸດທ້າຍພວກເຮົາກໍ່ເຂົ້າໃຈວ່າ ສິ່ງປະກອບທີ່ພວກເຮົາເຫັນຢູ່ສວນຜັກນັ້ນ ແມ່ນສິ້ນສ່ວນເຄິ່ງໜຶ່ງ ຂອງປອກລະເບີດ ບອມບີ ໜ່ວຍໃຫຍ່ ທີ່ຍັງຄົງຄ້າງແຕ່ສະໃໝ່ສົງຄາມ ແລະ ຖືກປະຊາຊົນໜູນໃຊ້ ເພື່ອເປັນຮາງປູກກອມບົ່ວ, ມັນເຮັດໃຫ້ຂ້ອຍຄົ້ນຄິດກ່ຽວກັບ ຕົ້ນກຳເນີດຂອງລະເບີດ ທີ່ເກີດຂຶ້ນໃນສະໄໝ ທີ່ບໍ່ທັນດົນເທົ່າໃດ ຢູ່ໃນພາກພື້ນນີ້ຂອງໂລກ.
![]() |
ລະເບີດຄົງຄ້າງຢູ່ລາວ (ຮູບຖ່າຍ NTPC) |
ຜູ້ທີ່ຮູ້ປະຫວັດສາດ ກ່ຽວກັບເຂດດັ່ງກ່າວນີ້ ກໍ່ຈະສາມາດເຂົ້າໃຂໄດ່ວ່າ ພູພຽງນາກາຍ ມີປະຫວັດສາດທີ່ຕິດພັນ ກັບເສັ້ນທາງໂຮ່ຈິມິນ ເຊິ່ງເປັນຈຸດໃຈກາງ ຂອງສົງຄາມອິນດູຈີນ ທີ່ເກີດຂຶ້ນ ໃນຊຸມປີ 60 ແລະ 70. ພາຍຫຼັງທີ່ມິດງຽບໄປໃນໄລຍະໜຶ່ງ, ພວກເຮົາກໍ່ໄດ້ສຶກສາ ສິ່ງຜິດ ປົກກະຕິດັ່ງກ່າວ, ແລະ ສັງເກດເຫັນວັນທີ ທີ່ສະຫຼັກຢູ່ທາງຂ້າງ ເອົາໄວ້ວ່າ: ເດືອນສິງຫາ 1968 ເຊິ່ງປະມານ 41 ປີ ທີ່ຜ່ານມາ.
ມາຮອດປະຈຸບັນ, ໂຄງການນ້ຳເທີນ 2 ໄດ້ເກັບກູ້ ລະເບີດຄົງຄ້າງ ຈຳນວນ 25.000 ລູກ ຈາກ ເນື້ອທີ່ປະມານ 6.700 ເຮັກຕາ ໂດຍໃຊ້ທຶນຮອນທັງໜົດ ປະມານ 18 ລ້ານ ໂດລາສະຫະລັດ ການເກັບກູ້ລະເບີດທີ່ຍັງຄົງຄ້າງ ບໍ່ພຽງແຕ່ເປັນການເປີດເນຶ້ອທີ່ທີ່ດິນປູກຝັງເພີ່ມເຕີມໃຫ້ປະຊາຊົນ, ແຕ່ມັນ ເປັນການເປີດເນຶ້ອທີ່ ເພື່ອເປັນທີ່ຢູ່ອາໄສຂອງປະຊາຊົນ ເພື່ອໃຫ້ປອດໄພຈາກຜົນຂອງສົງຄາມ ໃນອາດີດ. ລູກລະເບີດຫຼາຍລ້ານລູກ ໄດ້ກະແຈກກະຈາຍໄປທົ່ວເຄິ່ງໜຶ່ງຂອງປະເທດ ແລະ ສ້າງຄວາມ ລຳບາກກາກກຳ ໃຫ້ແກ່ປະຊາຊົນທົ່ວໄປ ທີ່ຕ້ອງການດຳລົງຊີວິດຂອງຕົນ ໂດຍອາໄສ ການປູກຝັງ ແລະ ລ້ຽງສັດ.
ຄ່ຽງຄູ່ກັບຄວາມພະຍາຍາມຂອງບັນດາປະເທດຕ່າງໆ, ສະຖາບັນ ແລະ ອົງການຈັດຕັ້ງອື່ນໆ ໃນການເກັບກູ້ລະເບີດ ທີ່ຍັງຄົງຄ້າງ, ໂຄງການນ້ຳເທີນ 2 ສາມາດເກັບກູ້ລະເບີດອອກຈາກໂຄງການ ລວມທັງເຂດຈັດສັນໃໝ່, ເຂດທີ່ເປັນຊັບສິນຂອງໂຄງການ ແລະ ເຂດທີ່ໄດຮັບຜົນກະທົບຈາກໂຄງການ, ເຊິ່ງແບບແຜນດັ່ງກ່າວນີ້ ແມ່ນສອດຄ່ອງກັບແຜນງານ ຂອງອົງການເກັບກູ້ລະເບີດແຫ່ງຊາດ ທີ່ໄດ້ກຳນົດ ໃຫ້ເກັບກູ້ລະເບີດ ອອກໃຫ້ໜົດ ຖ້າຫາກຕອນດິນດັ່ງກ່າວ ຈະຖືກນຳໃຊ້ເພື່ອການປູກຝັງ ຫຼື ເປັນທີ່ຢູ່ອາໄສ. ກົນໄກດັ່ງກ່າວໄດ້ລວມຢູ່ໃນວຽກງານ ປູກຈິດສຳນຶກ ໃຫ້ແກ່ຊຸມຊົນ ແລະ ເຮັດ ເປັນບົດລາຍງານຂຶ້ນ.
![]() |
ປ້າຍເຕືອນເຂດເກັບກູ້ລະເບີດຢູ່ລາວ. (ພາບຖ່າຍ NTPC) |
ຍັງມີອີກຫຼາຍໆດ້ານຂອງໂຄງການ ທີ່ນຳມາເຊິ່ງຜົນປະໂຫຍດ ທີ່ຫຼາຍຄົນບໍ່ຄາດຄິດເຖິງ ເຊັ່ນ: ການຄົ້ນພົບສັດພັນໃໝ່, ປະຊາຊົນທີ່ຖືກຍົກຍ້າຍ ສາມາດສະເໜີ ຄວາມຕ້ອງການຂອງຕົນ, ກົນໄກການຮ້ອງທຸກ ຖ້າຫາກປະຊາຊົນສູນເສຍເນື້ອທີ່ດິນ, ການຮຽນຮູ້ເຕັກນິກການປູກຝັງແບບໃໝ່ ເພື່ອເພີ່ມທະວີ ຜົນຜະລິດຈາກດິນປູກຝັງ, ລ້ຽງສັດ ແລະ ອື່ນໆ, ເຊິ່ງທັງໜົດເຫຼົ່ານີ້ ຈະໄດ້ນຳສະເໜີຕື່ມ ໃນຕໍ່ໜ້າ ເພາະວ່າແຕ່ລະວຽກງານທີ່ໄດ້ກ່າວມານັ້ນ ແມ່ນສົມຄວນທີ່ຈະໄດ້ຮັບການກ່າວເຖິງ.
Join the Conversation